گؤزلیم مشتری یم منده او شهلا گؤزیوه

قان اولان کؤنلوم اولوب واله وشیدا گؤزیوه

رحم قیل طره ی افشانیوی چک بیر طرفه

تا ائدیم شوقیله مین دفعه تماشا گؤزیوه

نرگس مستیوه مین داغلی اوره ک آلوده

قارلیکده چاتا بیلمز شب یلدا گؤزیوه

نازیله باخما گلر چشم خومارون نظره

ائیله حسرتله باخیر کی هامی دونیا گؤزیوه

کیپریگون چالما گولوم کاسه ی شبنم جالانار

گؤز تیکیب ریشه ی عشقین گؤلو دریا گرزیوه

بیر دایان باشیوی قوی چینیوه باخ بیر ائله کی

قان اوره ک دینجله بلکه قورا شورا گؤزیوه

هیجانیله باخاندا سارالیر روخساریم

دویمورام باخدیقیجا والله اوزیبا گؤزیوه

سنی نقّاش ازل طاعت اوچون بت یارادیب

باغلانیب لات ومناتیله چلیپا گؤزیوه

بیری واردیر گئجه گوندوز اوتوروب آسوده

آغلاغان شعروغزل ائیله یر انشا گؤزیوه

هر عاشق اولان عشقه گرفتار اولابيلمز

هر خورما ساتان ميثم تمار اولابيلمز

مخلوق خداوند اوزونه اولميان عاشيق

حق عاشقه تك صاحب ايثار اولابيلمز

دونيا مالونا شهرتينه وورقون اولانلار

انفاق ايله مز طالب ديدار اولابيلمز

ماموره اگر رشوه يماخ اولماسا عادات

مظلوملارين قاننه ظالم سورا بيمزا

ميمون تكين هر سوزه تقليد ايلينلر

انديشه اديب صاحب افكار اولابیلمز.

صابر يمه غم هر گونين ئوز قصه سه واردور

مفرق پاراسی گوهر شهوار اولابيلمز

اؤرگیـــم سئخلب قلبی داغلیام

مرحم تاپمـــورام یارامی باغلیام

دونیادا دردیم بیر ایکی دئیل کی

خلوت یئر گئزیرم اوتوروب آغلیام

خلوت یئر گئزیرم اوتوروب آغلیام

دونیــــــا گوزلدی گـــــوزل یاشیاسان

نه اینکی غم یوکون بئلده داشیاسان

اولمـــــوشام یــاوان باخـــــانا یاغلیام

خلوت یئر گئزیرم اوتوروب آغلیام

خلوت یئر گئزیرم اوتوروب آغلیام

عاصم اردبیلی:

گوزون دولوب سوزایلن بیلمیره م گوزون ده نه وار؟

اوزون گورن ده دیلیم لال اولور اوزون ده نه وار؟

باخان دا شـوق ایله شمشاد مثـلی قامت اینه

تاپانمیرام اوزومــو نازنین اوزون ده نه وار؟

آجی سوزون منه بال دان شیرین دی بیر سوزه گل

اوزون بویور بو معما نه دیر؟ سوزون ده نه وار؟

نه کوزدو کونلومو یاخدیقجا داغ لی لاله بیته ر؟

بو شـوره زاری گلستان ائده ن کوزون ده نه وار؟

عومور یازین دا کی کونلوم سن ایله یازلاندی

او یازلا یازلانیرام دادمیشام گوزون ده نه وار؟

او گون کی آیریلیقا چاره، دوز، دئدین هله لیک

اطاعتین ده وار عاصم گوره دوزونده نه وار؟

دئمه اوزون ده، سوزون ده، گوزون ده اولدوغونو

گوزون دولوب سوز ایلن کاش بیله ام گوزون ده نه وار؟

آزربایجان سنه سلام سویله رئم

یولوندا جانیمی قوربان ائیله رئم

اوپئرئم من سنین قیزیل توپراقین

گوزئل بایراقیوا سجده ایله رئم

آدین گلجک قوولنیر قوللاریم

اوره گیم تیتره ییر قاینیر قانیم

اومودومسان منیم شان شهرتیمسن

باش اوجا قالاسان قوجا آسلانیم

اوره گینده چوخدور سنین یارالار

تاریخده وئرمیسئن قوچاخ بالالار

قارابادا اوشاقلاران نه اولدی

یادان توشجک سنین رنگین سارالار

ایسته دیلر قاداسینلار قامتین

شاقاشاقا ایلئدیلئر بابکین

هر طرفدن باشان اودلار یاغدیلار

ساوالان تک اگیلمئدی قامئتین

دوست دوشماندان دالدان خنجر یئیبسئن

ظولومیله چوخلی عمور سوروبسئن

فیرتانادان دیزینده گوج قالماییب

آما گینه اوشاقلاران گولورسئن

گئلین بورکوموزی قویاخ قاباقا

ستارخان تک بیزلر دوراق آیاقا

دونیادا سئسلییک یوردومون آدین

بابک اولوب بایراق آساق قالایا

تورک ایگیدین قیچیندا قاندال اولماز

قارتال نجه دووشانا قووولماز

دوشمان قاباغیندا ییرتیجی اولار

توکسلئر قانینی هچ رنگی سولماز

سوساماریق دوشمان الی اوزانیب

داها پیچاق سوموهلرده دایانیب

جسارت ایلییب دیلر کسیلر

مگر خنجریمیز قیندا پاسلانیب

تولکو چاقال بوردا یووا سالیبدیر

غیرتلی ایگیدین پارچالانیبدیر

گلین بوز قورد اولاق تاریخیمیزده

دمه سینلر تورکون آدی قالیبدیر

ظولمت دووارینی گوجله ییخاریق

ظالیمین گووزونه کوز اود قالاریق

لازیم اولسا دوشمانلارین باشیلا

داغ دوزئلدیب اوستلرینده دوراریق

کور اوغلو تک یاغیلاری قوواریق

یوردوموزدان الئرینی قیراریق

هر کس تورکه بیرده آلچاقلیق ائدسه

قلینجیلا اونون قارنین جیراریق

اوندا گئلئر سن ایستیین زامانلار

قارانیقلار قاچار یانار یامانلار

کسئمئزلر حق دانیشان دیلئری

گولسون اولار ایگید دوغان بایانلار

اودمان گئلئر آزادلیقین هارایی

گوجاقلاشار گونی گوزی داغلاری

آراز اوسته مینلر کورپی قوراللار

قالدیریلار آزربایجان بایراقی

علی آقا واحد:

فخر ائیلمه، ای بولبول شیدا،چمنیم وار،

قوی فخر ائله ییم من کی،گوزه ل بیر وطنیم وار

نامردم، اگر حوری و قیلمانا دگیشسم،

گولزار وطنده او گوزه للرکی،منیم وار

فخر اولماسا، فرهادی،دئیردیم،منم عصرین

مینلرجه منیم خسرو شیرین سخنیم وار

باخدیقجا بو گول روخلره آرتیر یئنه عشقیم،

بوندان بئله دونیادا نه درد و محنتیم وار

مجنونویام هر بیر اوجا بویلو،قارا زولفون،

ای مدعی،گل گور نئجه سرو سمنیم وار

گنجم،گوزه لم، خالقیمین ایستکلیسییم من،

قیمتلی گوهر تک وطنیمده سونیم وار

واحید،منه تکلیف ائلمه اوزگه نیگاری،

اوز سئوگیلیم،اوز دیلبر نازیک بدنیم وار

تارچی الین آپــــــار تارا

اورک ده وار دریـــن یارا

تارین تئلین یـاواش دارا

دردین آلیم چال تارووی

باغرووا چک دیلدارووی

تارچی اورک اولـوب یارا

سیزیـلدائـیر گـلـیـب زارا

دای اولموشام لاپ آوارا

دردین آلیم چــال تارووی 

باغرووا چک دیلدارووی

تارچی بـونـو سویـله یارا

چکـیـب منی زولــفو دارا

دئسین منه باخـتـی قارا

دردین آلیم چــال تارووی

باغرووا چک دیلدارووی

تارچی منیم یاریم سارا

قـویما اونـــو سئل آپارا

دردیمه سن ایله چــارا

سنی من چوخ سئویرم سوگل جانان منه باخ

گول اوزون گیزلمه مندن مه تابان منه باخ

منکی عشقیندا سنین باغریمی قان ایله میشم

قویما قالسین بو اوره ک بیکسو نالان منه باخ

دردیمی هانسی طبیبه گدیم اظهار ائله ییم

سن اوزون اول گوزلیم دردیمه درمان منه باخ

گوزلرین بیر دنیز اولسا گمی یم منده اونا

رحم ائله سن گمی یه ائله مه طغیان منه باخ

ای گوزل جمسیمه جان وئر داهی یوخ صبروقرار

بو سوینجده ائلمه مولانی پشمان منه باخ